ગલબાભાઈ નાનજીભાઈ પટેલ - જીવન ઝરમર, વ્યક્તિ-વિશેષ

ધન્ય હો આવા મહાનુભાવોને……

[ વડગામ તાલુકાના નળાસર ગામના વતની અને બનાસકાંઠાના લોકસેવક સ્વ.શ્રી ગલબાભાઈ નાનજીભાઈ પટેલ વિશેના પોતાના અનુભવો વડગામના ગાયત્રી ઉપાસક અને સમાજસેવક શ્રી મહોતભાઈ જીતાભાઈ પટેલે લખ્યાં છે જે તેમની ડાયરી માંથી લઈને અત્રે  વડગામ વેબસાઈટ ઉપર લખવામાં આવ્યો છે. આ માહિતી વડગામ.કોમને આપવા બદલ શ્રી મહોતભાઈ જીતાભાઈ પટેલનો અંત:કરણપૂર્વક આભાર… ]

GNPબનાસડેરીના એક પ્લાન્ટનું ઉદ્દઘાટન હતું. દૂર દૂર થી આમંત્રિત મહેમાનો તથા અધિકારી વર્ગ ડેરીના એક સભાખંડમાં ઉપસ્થિત થયો હતો. સભાખંડમાં ઘણા લોકો આવતા હતા અને ઘણા બહાર જતા હતા. થોડીવાર પછી જમણવાર થવાનો હતો.

દૂરથી એક માણસ ખાદીના સાદા કપડાં, ઝભ્ભો અને ધોતી, માથે ખાદીની સફેદ ટોપી પહેરીની આવતો દેખાયો તેના મોંઢા પર થાકની રેખાઓ સ્પષ્ટ દેખાતી હતી પણ જલ્દી જલ્દી તે સભાખંડ તરફ આવી રહ્યો હતો. હાથમાં એક સાદી થેલી હતી તેમાં કંઈક મહત્વના કાગળો હતા.

હું જ્યાં બેઠો હતો ત્યાં સભાખંડની શેતરંજી પર નીચે જ મારી જોડે બેસી ગયો. મેં સામે જોયું તો આતો બનાસડેરીના ચેરમેન અને બનસાકાંઠા જિલ્લા પ્રમુખ  શ્રી ગલબાભાઈ નાનજીભાઈ પટેલ હતા. મને નવાઈ લાગી કે જેને ત્યાં ડેરીમાં આટલું મોટું ફંકશન છે, , જેણે આટલા લોકોને ડેરીમાં આમંત્રણ આપ્યું છે અને તે માણસ આમ સાદા ડ્રેસમાં અને અમારી વચ્ચે કેમ બેસી ગયો. સામે જ મોટા મહેમાનો અને અધિકારીઓ માટે ખુરશીઓ ગોઠવાયેલી હતી ત્યાં કેમ નહી ? મને ખૂબ જ સંકોચ થયો. હું કંઈ બોલી શક્યો નહી. પણ મારી જોડે બેઠેલા એક ભાઈએ કહ્યું. “ અરે ગલબા કાકા આપ અહીંયા નીચે ક્યાં બેસો છો ?” સાહેબ આપને તો ત્યાં અધિકારી સાહેબો જોડે ખુરશી પર બેસવાનું હોય. અહીં નીચે બેસીને અમેને શરમાવો છો.

તેમના કપડા થોડા મેલાં પણ હતાં. તેમણે કહ્યું  “ભાઈ ઉપર અને નીચે બધે બેસવાનું જ છે ને હું તો મારા ભાઈઓ જોડે નીચે બેસું તો જ ફાવે.” આ જુઓને ખુરશીમાં બેસી બેસીને હું તો કંટાળી ગયો છું મને નીચે કોઈ બેસવ દેતું જ નથી.

ફરી બીજા ભાઈએ પૂછ્યું “સાહેબ તમારે ત્યાં આટલું મોટું ફંકશન છે ને વાંસામાં ફાટેલો ઝભ્ભો પહેરીને કેમ  આવ્યા છો ? અને આ કપડા પણ મેલા જેવા દેખાય છે.”

તેમણે જવાબ આપ્યો “ભાઈ અમારે ક્યાં શાંતિ હોય છે.” આ ત્રણ દિવસથી સરકારી કામે અમદાવાદ ગયો હતો આજે જેમ તેમ કામ નિપટાવીને ડેરીમાં પ્લાન્ટનું  ઉદ્દઘાટન હોવાથી ગાડીમાં દોડતો દોડતો આવ્યો. આ ત્રણ દિવસથી ગાડીમાં બેઠા બેઠા આ ઝભ્ભો જુનો હ્તો અને વાંસા માંથી જળી ગયો હોવાથી ફાટી ગયો. આ ઘેર ન્હાવા ઘોવા જવાનો સમય ન મળવાથી કપડા પણ મેલાં થયા છે પણ શું કરું દોડધામથી થાકી ગયો છું. મેંલા કપડાથી કોઈ કાઢી થોડું જ મુકવાનું છે.

એક ભાઈ એ કહ્યું  “કાકા તમારે ત્યાં અવસર છે ને તમને કોણ કાઢી મુકવાનું છે ? “આપ તો મોટા માણસ છો પણ આપની કેટલી મોટાઈ છે…”

આ હતા બનાસડેરીના સ્થાપક ચેરમેન અને બનાસકાંઠા જિલ્લાના પ્રમુખ સ્વ.શ્રી ગલબાભાઈ નાનજીભાઈ પટેલ આપણા ગલબા કાકા….

સીધુ સાદું એમનું જીવન અને સાદી રહેણી કરણી કોઈ સભામાં પ્રવચન કરવા ઊભા થાય તો પણ સાદી ગામઠી ભાષામાં પ્રવચન કરે. જીવનમાં કોઈ જાતનો ડોળ કે દંભ નહી તે બનાસના ગાંધી કહેવાતા.

એટલા મોટા હોદ્દા પર હતા છતાં જરાય મોટાઈ એમનામાં દેખાતી ન હતી.

ધન્ય હો આવા મહાનુભાવોને………